76/2020: Lög um Loftslags- og orkusjóð

Lög um Loftslags- og orkusjóð

2020-07-10 76 2020 nr. 76 10. júlí

L. 66/2024, 6. gr.

<a href="https://www.althingi.is/thingstorf/thingmalalistar-eftir-thingum/ferill/?ltg=150&mnr=639"> Ferill málsins á Alþingi. </a> <a href="https://www.althingi.is/altext/150/s/1083.html"> Frumvarp til laga. </a> Tóku gildi 14. júlí 2020. Breytt með: <a href="/altext/stjt/2024.066.html"> L. 66/2024 </a> (tóku gildi 1. júlí 2024). <a href="/altext/stjt/2024.110.html"> L. 110/2024 </a> (tóku gildi 1. jan. 2025 nema 3. mgr. 2. gr. sem tekur gildi 1. jan. 2026; um lagaskil sjá 7. gr. og brbákv.). Ef í lögum þessum er getið um ráðherra eða ráðuneyti án þess að málefnasvið sé tilgreint sérstaklega eða til þess vísað, er átt við umhverfis-, orku- og loftslagsráðherra eða umhverfis-, orku- og loftslagsráðuneyti sem fer með lög þessi. Upplýsingar um málefnasvið ráðuneyta skv. forsetaúrskurði.

1. gr.

Loftslags- og orkusjóður. Starfrækja skal sjóð í eigu íslenska ríkisins sem nefnist Loftslags- og orkusjóður. Ríkið ber ábyrgð á skuldbindingum sjóðsins og heyrir hann stjórnarfarslega undir ráðherra.

L. 66/2024, 2. gr.

L. 66/2024, 1. gr.

2. gr.

Hlutverk. Hlutverk Loftslags- og orkusjóðs er að stuðla að hagkvæmri nýtingu orkuauðlinda landsins með styrkjum eða lánum, einkum til aðgerða er miða að því að draga úr notkun jarðefnaeldsneytis og auka nýtingu á innlendum endurnýjanlegum orkugjöfum. Loftslags- og orkusjóður styður jafnframt við verkefni sem stuðla að orkuöryggi og samkeppnishæfni á sviði orkumála og orkutengd verkefni á grundvelli orkustefnu, nýsköpunarstefnu, byggðastefnu og stefnu stjórnvalda í loftslagsmálum. Loftslags- og orkusjóður skal enn fremur styðja við nýsköpunar- og innviðaverkefni á sviði loftslagsmála, verkefni sem stuðla að innleiðingu hringrásarhagkerfisins og verkefni sem lúta að kynningu og fræðslu um áhrif loftslagsbreytinga. Jafnframt er hlutverk Loftslags- og orkusjóðs að sjá um beinar stuðningsaðgerðir, svo sem styrki til kaupa á rafbílum og styrki til jarðhitaleitar, eftir atvikum hverju sinni.

L. 66/2024, 1. gr.

L. 66/2024, 3. gr.

3. gr.

Stjórn. Ráðherra skipar fimm einstaklinga í stjórn Loftslags- og orkusjóðs til fjögurra ára. Formaður skal skipaður án tilnefningar og honum til viðbótar skipar ráðherra einn fulltrúa án tilnefningar, einn fulltrúa, sem hefur þekkingu á loftslagsmálum, samkvæmt tilnefningu háskólasamfélagsins, einn fulltrúa samkvæmt tilnefningu Samtaka atvinnulífsins og einn fulltrúa samkvæmt tilnefningu umhverfisverndarsamtaka. Stjórn Loftslags- og orkusjóðs skal hafa yfirumsjón með umsýslu sjóðsins í samræmi við hlutverk hans. Umhverfis- og orkustofnun annast daglega umsýslu Loftslags- og orkusjóðs undir yfirstjórn stjórnar sjóðsins. Stjórninni er þó heimilt að framselja óháðum aðila faglega umsýslu sjóðsins samkvæmt samningi. Ákvarðanir sem teknar eru um að veita styrki úr Loftslags- og orkusjóði eru endanlegar á stjórnsýslustigi.

L. 66/2024, 4. gr.

L. 66/2024, 1. gr.

L. 110/2024, 8. gr.

4. gr.

Fjármögnun verkefna. Stjórn Loftslags- og orkusjóðs gerir tillögur til ráðherra um lánveitingar úr Loftslags- og orkusjóði í samræmi við áherslur og stefnumótun stjórnvalda sem og fjárhags- og greiðsluáætlun sjóðsins. Loftslags- og orkusjóði er ekki heimilt að veita Umhverfis- og orkustofnun styrki eða lán af fé sjóðsins.

L. 66/2024, 1. gr.

L. 66/2024, 5. gr.

L. 110/2024, 8. gr.

5. gr.

Eftirlit. Þeir sem hljóta styrk eða lán frá Loftslags- og orkusjóði skulu gera grein fyrir framvindu verkefna og ráðstöfun fjár samkvæmt nánari reglum stjórnar Loftslags- og orkusjóðs. Ríkisendurskoðun annast árlega endurskoðun reikninga Loftslags- og orkusjóðs.

L. 66/2024, 1. gr.

6. gr.

Tekjur. Tekjur Loftslags- og orkusjóðs eru framlag úr ríkissjóði samkvæmt ákvörðun Alþingis á fjárlögum hverju sinni og vextir af fé sjóðsins.

L. 66/2024, 1. gr.

7. gr.

Kostnaður af rekstri. Kostnaður af rekstri Loftslags- og orkusjóðs greiðist af tekjum hans eða eigin fé.

L. 66/2024, 1. gr.

8. gr.

Reglugerðarheimild. Ráðherra skal setja í reglugerð nánari fyrirmæli um skilyrði fyrir framlögum úr Loftslags- og orkusjóði, undirbúning úthlutunar, lánveitingar, þ.m.t. vexti og önnur útlánakjör, greiðslur, eftirlit með framkvæmdum sem Loftslags- og orkusjóður veitir fé til og heimildir til að fella niður endurgreiðsluskyldu lántaka. Stjórn Loftslags- og orkusjóðs getur sett nánari reglur og skilyrði um tilfærslu fjármuna milli einstakra verkefna ef nauðsyn krefur. Ráðherra er heimilt að setja í reglugerð nánari ákvæði um starfsemi og skipulag Loftslags- og orkusjóðs og framkvæmd laga þessara.

L. 66/2024, 1. gr.

<a href="https://www.reglugerd.is/reglugerdir/allar/nr/1566-2024">Rg. 1566/2024</a>.

9. gr.

Gildistaka. Lög þessi öðlast þegar gildi. …